— 270 —
„Dia pergi ka mana ?"
Boedjang itoe tinggal menggagoe. Ia merasa kakinja tida sampe koewat boeat berdiri lebi lama lagi.
„Koerang adjar!" kata Kek-soen. „Bilang jang goea dapet demam dan panggil dia poelang lekas-lekas!"
Djamea djawab prenta itoe dengen bersender di tembok dapoer. Di itoe masa ia rasaken dirinja berada di antara hidoep dan mati.
„Lekas-lekas!" kata poelah Kek-soen, jang sabegitoe djaoe belon dapet doegahan soeatoe apa, kamoedian sigra ia bertindak mengamperi pintoe kamar, jang ia dapeti ada terkoentji dari dalem.
Ia menggedor bebrapa kali dengen koerang sabar, seraja seroeken, katanja:
„Soan! Soan!! enak amat loe mendekok! Lekas boekah! goea dapet demam."
Tida ada satoe orang jang mendjawab. Dari dalem kamar malaenkan ada soeara kasak-koesoek, tapi itoe sama sekali tida dapet didenger oleh Kek-soen, jang di itoe masa sedeng ada bergoemeter saäntero toeboe dan anggota, Lantaran itoe djadi ia menggedor pintoe lebi keras, lebi keras-lagi.
„Dasaran loe! kata Ban-tjoan, samantara ia tida taoe bagimana misti berboeat. „Kaloe tadi loe kasi goea poelang sadja soeda oeroes-oeroes."
Soan-nio tida bisa kata soeatoe apa. Ia poenja
