— 190 —
Ia makan koewe-koewe, minoem satjangkir thee dan isap tjeroetoe sembari gojang-gojang kaki. Samantara itoe koepingnja dapet denger lagi Kek-soen berseroe:
,,Ohtjhio!"
Dian-hoei keboelken asap tjeroetoenja, dan menggrendeng:
,,Sekarang dia maen ohtjhio, jang lebi doeloe sama sekali dia belon taoe boekah. Goea sekarang misti lebi ati-ati, soepaja djangan kenah didjoewal sama dia, sebab goea poenja-beladoe soeda tinggal tida sabrapa."
Kamoedian ia berbangkit, dan berdjalan teroes kaloear. Sasoeda moendar-mandir di nataran sakean lama, laloe. ia masoek kombali, dan berdiri di depan medja djoedi.
Kek-hoaij, jang lantas sadja dapet liat itoe orang Pekalongan, lantas tertawa bergelak-gelak, kamoedian laloe berkata:
,,Wa ini enko, dimana dia soeda betapa sampe begitoe lama? Kaloe begini gelagatnja dia tentoe ada niatan boeat bikin habis kita poenja oewang jang ada di depan. Tapi engga apa la! Satoe kali soeda maen maoe apa ditakoetin lagi segala djimat Kalongan!"
“Memang betoel-betoel owee nanti bikin habis itoe oewang, ko Kek-hoaij," kata Dian-hoei dengen bersenjoem. ,,Tapi kaloe soeda kalah djangan toh djadi sakit hati sama owee."
