— 163 —
„Orang dari melek mata saia kaga brentinja disoeroe kasana kamari sama baba. Tadinja saia ingetan maoe berlaga begini-begitoe, habis lantas ngelès satoe-doewa djam boeat katemoeken baba disini, tapi nona kata djangan begitoe, sebab ditakoetin baba nanti djadi mara. Saia pikir ja betoel djoega: kaloe sampe saia dioesir kan samoea lantas djadi gagal? Mana lebi baek boeat sakali ini baba jang menoenggoe di sini sedikit lama, habis kasanain samoea perkara nanti bisa berdjalan dengen beres."
„Kaloe begitoe si ada betoelnja djoega loe soeroe goea menoenggoe di sini. Goea tadinja soeda djadi kliwat mendongkol dan lantas maoe mara sama loe. Habis itoe perkara bagimana ? Apa samantar malem goea soeda boleh moelahin dateng ? — lekas tjerita sadja dengen teroes-terang,"
„Samoea baba poenja harepan saia soeda dapetin. Samentar malem djoega boleh dateng, tapi djangan lantas dateng-dateng masoek karoemah, sebab kaloe saändenja baba ada di dalem, nanti boleh djadi tjilaka samoeanja. Saia rasa jang paling baek begini da : kira-kira poekoel sabelas baba toenggoe di oedjoeng Gang Kampoeng Opak, sebab begitoe waktoe di sitoe soeda sepi sekali. Nanti begitoe waktoe djoega saia dateng samperin baba boeat kasi taoe apa baba boleh dateng engga."
„Kaloe poekoel sapoeloe sadja si masa kanapa. Goea rasanja engga sabaran toenggoe poenja toenggoe sampe begitoe lama."
