Kenalan lama.
275
nistjaja kau djadi binasa pertjoema. Di ini masa tiada boleh gampang pertjaja pada orang-orang Albanie jang soeda kena diasoet oleh itoe bangsat Reschid. Boekan toean, hanja itoe imam doerhaka jang haroes mati, satoe hoekoeman boeat segala dosa dan kedjahatannja.”
„Tapi saja tiada bisa balik poelang,” menjaoet Mohamed Ali dengen swara tetep. „Saja soeda bardjandji sama kapala-kapala dari Skipi aken saja pergi berdjoempa pada marika itoe boeat bitjaraken teroes oeroesan kita orang. Laen dari begitoe saja ada djadi gouverneur dari ini provincie dan panglima prang dari Sultan Toerki, hingga tiada haroes saja moendoer boeat satoe kawanan orang peroesoehan. Djika saja moendoer, nistjaja seantero rahajat negri di Arnautlik djadi bergerak aken brontak, kerna iaorang nanti kira saja ada takoet dan saja sendiri nanti dapet mara dari pamerentakoe serta dapet maloe dari orang banjak.“
„Djangan bantahan, toean pacha,“ kata Chefket poela dengen merasa tiada senang. „Toeroetlah bitjara saja jang dateng kasi nasehat dengen toeloes hati, Djikaloe toean pergi djoega ka tempatnja itoe kapala-kapala Skipi, nistjaja toean nanti binasa lantaran perboeatan chianat dari iaorang. Baeklah toean poelang dan boleh ambil atoeran kras aken kasi bagian jang pantes pada itoe orang-orang doerhaka.“
—„Saja ada bawa soldadoe aken djaga dirikoe dan orang-orang peroesoehan tiada nanti brani
