— 50 —
Sebagimana soeda ditoetoerken, itoe waktoe Landru sendiri jang sahoetin itoe telefoon, maka koetika ia dapet bitjara pada itoe nona, ia laloe kaloearken soearanja jang aloes, dan tjeritaken jang ia baroe sadja balik dari perdjalanannja ka Brussel, kamoedian ia oendang itoe nona aken besok sore dateng ka roemahnja boeat minoem thee, oendangan mana ada ditrima dengen girang hati oleh itoe nona, maka telefoon laloe ditaro lagi sasoedanja marika bitjara sedikit boeat laen-laen oeroesan.
Sembari berdjalan ka kamar makan, Landru tjatet dalem ia poenja boekoe notitie djam brapa ia bakal trima koendjoengannja itoe nona.
Koetika Landru sampe di kamar makan, dengen sanget terkedjoet ia liat njonja Juvanon sedeng pegangin serentjeng boeah anggoer, dan dengen roepa sedikit maloe ini njonja laloe berkata pada Landru:
„Akoe harep kaoe tida goesar, tapi itoe boeah anggoer jang roepanja begitoe seger, soeda bikin akoe merasa mengiler, hingga zonder toenggoe kaoe poenja permisi akoe soeda ambil ini satoe rentjeng dan soeda dahar dengen enak."
Sakoetika lamanja Landru tida bisa berkata apa-apa, tapi boeat semboeniken ia poenja rasa kaget, ia soengging satoe senjoem di pipinja. Achir-achir ia berkata:
„Silahken njonja, makan lagi ini boeah".
Landru tida pikirken poela apa jang bakal kadjadian dengen itoe doea njonja jang soeda makan begitoe banjak boeah anggoer jang teratjoen, apa jang Landru pikirken, jalah bagimana ia moesti sadiaken djalan soepaja oewangnja itoe njonja lantas bisa djato di tangannja sabegitoe lekas marika berdoea soeda meninggal doenia lantaran teratjoen.
Maka sasoedanja bertjakepan dengen kotjak, Landru laloe oendang, njonja Juvanon dateng di laen kamar boeat bitjaraken lebih djaoe tentang itoe pendjoealan barang. Pembitjarahan itoe tida lebih lama dari sapoeloe minuut, kerna sasoedanja dapet kanjataän jang ia tida bakal dapet banjak oewang, lantas Landru bikin pendek itoe omongan, hampirken poela pada njonja Nadaud. Pada kadoea prampoean itoe Landru adjakin aken pergi nonton pertoendjoekan opera jang maen di gedong Casino de Paris, tawaran mana ditrima dengen girang hati oleh itoe doea prampoean.
