— 16 —
Koetika Landru poelang di waktoe tengah malem, dalem hatinja merasa amat heran jang Andre masih tinggal idoep. Aken tetapi di hadepannja njonja Cuchet ini pendjahat oendjoek roepa jang amat doeka lantaran Andre ada dalem sakit.
Landru soeda ambil poetoesan jang tetep bahoewa sabelonnja matahari terbit, baek njonja Cuchet atawa poen Andre moesti disingkirken dari doenia, sedeng kaperloean boeat lakoeken ini kadjahatan soeda disediaken
Laen dari pada itoe, Landru soeda ambil tindakan-tindakan djoega boeat singkirken tanda-tanda dari ia poenja kedjahatan, hingga di waktoe matahari mementjarken sinarnja, itoe samoea tanda aken ilang boeat selama-lamanja.......
Dengen omongan jang manis Landru boedjoek njonja Cuchet aken boeka satoe botol ,,Madeira" (samatjem anggoer).
,,Ini hari akoe soeda dapet banjak oentoeng", begitoelah Landru bitjara, ,,dan akoe harep jang kaoe orang soeka minoem boeat akoe poenja kaberoentoengan".
Begitoelah dengen girang orang laloe boeka anggoer Madeira, dan njonja Cuchet bersama Andre laloe minoem itoe anggoer boeat kaberoentoengannja Landru. Tiada satoe antaranja njonja Cuchet dan Andre ada doega atawa poen merasa jang dalem anggoer itoe ada tertjampoer ratjoen.
Ilangnja njonja Cuchet dan Andre tiada saorang jang taoe, aken tetapi pengarang dari ini boekoe bisa kasi katrangan jang tjoekoep dengen tjara bagimana ini pendjahat jang paling kedjem dan paling tjerdik soeda lakoeken itoe pemboenoehan.
Sembari tertawa dan mengomong sama njonja Cuchet dan Andre, Landru temenin marika doedoek sampe djam sablas malem.
Bebrapa djam kamoedian doea orang tani, satoe lelaki dan satoe prampoean, jang liwat depan roemah itoe telah dapet liat dapoernja Landru berkobar, sedeng sakoempoelan asep jang tebel ada kaloear dari lobang asep.
Apatah soeda terdjadi dalem itoe roemah jang soenji?
