BAGIAN KA VII.
Tjari korban baroe.
———
Sasoedanja terbebas dari bahaja kamatian di tangannja itoe badjingan Landru, dan dengen naek kreta api jang berdjalan siang malem dari Italie ka Frankrijk, satoe perdjalanan jang amat djaoe, achir-achir njonja Elise Laporte sampe di kota Parijs dengen badan lelah pada djam sabelas malem.
Dengen mengandoeng maksoed jang keras aken membales sakit hati pada itoe lelaki djahanam, njonja Elise Laporte dari station laloe berangkat poelang ka roemahnja dengen pikiran besok harinja ia nanti kasih rapport pada politie. Tjoba itoe malem badannja tida terlaloe tjape, tentoe ini prampoean soeda dateng pada politie.
Pada satengah djam kamoedian sedari sampenja trein jang didoedoeki oleh njonja Laporte, djoega sampe di itoe station satoe trein dari Marseille jang bawa dateng itoe badjingan Landru. Ini bangsat telah dapet katahoei jang ia di-ikoetin oleh moesoehnja, maka ia singga di Marseille, kamoedian ia sendiri jang berbalik koentitin itoe prampoean.
Satelah sampe di Parijs Landru tida brani oendjoek moekanja pada orang banjak, saban kali katemoe orang politie ia selaloe lengosken moekanja. Ia pikir djalan jang paling baek, jalah semboeniken diri sakoetika lamanja sampe nanti dateng koetika jang baek aken tjari korban baroe.
Satelah kaloear dari station, Landru lantas menoedjoe ka satoe roemah barang lelang di Montrouge dimana ada berdiam ia poenja satoe sobat nama Caillard, soedagar barang lelang atawa toekang tada barang tjoerian, jang soeda banjak djoega beli barang-barang demikian dari tangannja Landru. laorang ada kenal baek satoe sama laen. Koetika Landru mengetok pintoe roemahnja ini soedagar di waktoe malem, ia ini merasa haran dan terkedjoet djoega jang Landru soeda dateng bagitoe terkoenjoeng-koenjoeng.
