Halaman:Lamijoe Wakong.pdf/76

Dari Wikisumber bahasa Indonesia, perpustakaan bebas
Halaman ini tervalidasi

74

die sini minta tanja sama Koan-Im-Hoetbo soepaija die bilangin siapa njang ambil itoe Kimto, banjak-banjak trima kasie, en Koan-Im-Hoetbo dengar tjaritanja begitoe, Koan-Im lantas boeka matanja liat kere kanan, kata: loe poenja ma poenja Kimto boekannja siapa njang laga'in, ija itoe Wakong njang „phie” djadie soeroe'an Toehan pegie pindjem itoe Kimto sama loe poenja ma, itoe Kimto dia maoe bikin Shakak Kim Tjoei; San Sengbo kata: ini Wakong dia djoega ada poenja itoe Shakak Kim Tjoei, boeat apa dia bikin lagie? Koan-Im kata: dia poenja Shakak Kim Tjoei, Lotjia soeroe setan Tjar-Tjar pegie laga'in dapet itoe Shakak Kim Tjoei die kasie sama Lotha, mangka itoe Wakong poenja orang nama Tjian Ligan Soen Hong Nje bilangin Wakong dia kata loe poenja ma ada poenja Kimto bole bikin sama itoe Shakak Kim Tjoei, mangka Wakong pegie sama ma loe laga in itoe Kimto; San Sengbo dengar Koan-Im kata begitoe, lantas dia membrie hormat, djalan poelang bilang begitoe sama manja, manja kata: kaloe Wakong ambil tentoe soesa dapet kombalie itoe Kimto, sekarang pegimana baenja? menjaoet anaknja njang proempoean Kiongtjoe kata: kaloe Wakong njang ambil itoe Kimto, nantie saija pegie lawan sama dia en saija tiada takoet, en saija ada poenja Popwe Kipas, kaloe saija minta itoe Kimto dia tiada maoe baijar, saija lantas kipas sama dia sampe setenga langit, biar dia djato en toelangnja sampe antjoer; manja dengar soeka atie lantas soeroe lekas pegie, en Kongtjoe masoek die dalem berpake bagoes-bagoes kloewar koeda bawa dia poenja toembak dan Popwe Kipas sama orang-orangnja, djalan sampe die Goenoeng Libiesan memakie maoe minta itoe Kimto; en Wakong lagie doedoek, orangnja