— 71 —
„Nah, kaloe ’gitoe sih gampang sadja,“ kata itoe toekang praoe. „Akoe ada mempoenjai satoe praoe besar jang biasa menarik moewatan dengen bikin perdjalanan di sepandjangnja soengei Yangtjoe ini; tapi blakangan akoe poenja anak lelaki mati hingga akoe tida bernapsoe lagi boewat bikin peladjaran djaoe, kasi sewa praoe ‘koe jang besar itoe pada laen orang, dan akoe sendiri menembangin ini praoe ketjil moendar mandir antara pelaboean Hankauw dan Boetjiang; Sekarang kaloe kaoe soeka bekerdja padakoe, baeklah kita meneroesken lagi itoe pakerdja‘an jang lama, dan akoe bakal minta poelang itoe praoe besar pada jang menjewa, kerna memang tida ada ditetepken boewat disewaken bebrapa lamanja.“
Lauw Soe Sam jang soeda kepepet betoel-betoel dalem penghidoepan, soeda tentoe sadja ia soeka sekali menerima tawarannja itoe toekang praoe; begitoelah moelai dari itoe waktoe Lauw Soe Sam bekerdja pada itoe toekang praoe, jang blakangan ia taoe bernama Hwan Tjit Kioe. Lauw Soe Sam rasanja soeda taoe denger itoe nama, tapi ia tida bisa inget di mana dan berhoeboeng dengen oeroesan apa.
Sampe lima taon lamanja Leuw Soe Sam teroes bekerdja pada Hwan Tjit Kioe dengen radjin dan tida perna bergaoelan pada laen orang, selaennja iapoenja madjikan dan satoe anak praoe laen. Sepandjang itoe waktoe, diem-diem Hwan Tjit Kioe tilik tabeat dan boedi peranginja iapoenja penggawe moeda itoe, hingga pada soeatoe waktoe ia djadi merasa poewas. Pada soeatoe hari djoestroe hari raja Tiongtjhioe, sedeng iaorang poenja praoe djoestroe lagi menganggoer, kerna baroe sadja balik poelang pelajaran ka Anhoei Sedari masi siang Hwan Tjit Kioe pesen Lauw Soe Sam membeli bebrapa botol
