― 61 ―
Lim sie ada sangat eilok, tapi lantaran sang ajah terlaloe pilih boeloe, lantaran ingin mempoenjai mantoe orang terpladjar dan bertitel, hingga sampe beroemoer doeapoeloeh anam taon masi tinggal djadi prawan toea. Lauw Kiat Beng taoe hal itoe, laloe madjoeken lamaran, dan dengen tida banjak soesa lantas ditrima, kerna itoe djoeroe hoekoem namanja sangat terkenal di antara pendoedoek kota Boetjiang.
Tjoema sajang sekali Lim-sie sekali poen parasnja sangat eilok, tapi tida terpladjar sama sekali, malah lantaran iapoenja orang toea penghidoepannja tjoekoep, sedikit banjak iapoenja adat ada tinggi dan kolokan. Perkara jang paling aneh, dalem sapoeloeh taon lamanja ia menikah pada Lauw Kiat Beng, tapi belon djoega maoe mempoenjai anak.
Lauw Kiat Beng lantaran oemoernja soeda satengah abad, masi belon djoega bisa mempoenjai anak laloe mengandoeng niatan memiara satoe goedik, kerna ia ingin soepaja toeroenannja djangan sampe terpoetoes. la tjoba kasi taoe hal itoe pada iapoenja istri, tapi Lim-sie lantas sadja bantah keras dan bikin riboet, katanja ia sendiri poenja oemoer masi belon ampatpoeloeh masi ada pengharep boeat melahirken anak. Kaloe sadja ia masi belon tjoekoep beroemoer ampatpoeloeh taon, ia tida nanti perkenanken soewaminja ambil goendik. Lauw Kiat Beng jang tida soeka riboet sama orang prampoewan, lantas oeroengken iapoenja niatan itoe.
Tapi Lim-sie jang mendapet taoe soewaminja ingin mempoenjai goendik lantaran ingin mempoenjai anak boeat menjamboeng toeroenannja merasa sanget sakit hati dan penasaran mengapa ia tida bisa melahirken anak. Ia denger Kwan Im Posât dari Pek-ie-am di sabelah timoernja itoe kota, katanja ada sanget
