― 54 ―
kapala oppas politie, hingga marika itoe mendapet rangketan sampe bebrapa kali.
Tjoema sadja, Tan Tjoe Sim, itoe tihoe dari Boetjiang, ada seorang terpladjar jang mendapet gelaran Tjinsoe, boekan sadja ja ada pinter malah hatinja poen sanget moerah dan djoedjoer. Ia merangket pada iapoenja kepala kepala oppas meloeloe tjoema menoeroetin sadja kabiasa‘an boewat menggentjet soepaja It Kie Tho bisa tertangkep; tapi blakangan koetika meliat It Kie Tho poenja gerakan ada begitoe roepa, ia lantas mengarti bahoewa iapoenja kawanan oppas politie tida satoe di antaranja jang bisa tandingin It Kie Tho poenja ilmoe kapandean, dengen begitoe, tjara begimana ia bisa mengharep boewat bisa menangkep pada itoe perampok.
Tatkala terdjadi pemboenoehan atas dirinja Han Koei Soei dan istrinja, tjongtok telah panggil Tan Tjoe Sim tihoe mengadep dan dikasi tegoran keras, serta dikasi tempo satoe minggoe boewat menangkep pada It Kie Tho, dan pada harian Tio Beng sampe ka Boetjiang, itoe tempo toedjoe hari soeda sampe, maka dengen penoeh pengrasa‘an koewatir Tan Tjoe Sim pergi mengadep pada iapoenja chef boewat melaporken apa jang ia soeda kerdjaken sepandjang itoe waktoe, tapi tida berhasil, sekalian maoe minta lagi tempo jang lama‘an.
„Apa, kombali koeihoe ada itoe moeka boewat dateng ka sini minta kalonggaran tempo ?“ berseroeh itoe tjongtok dari Ouwlam dan Ouwpak koeuka soeda mendenger omongannja itoe tihoe. „Tida! satoe kali ini akoe tida bisa kasi tempo lagi, hanja akoe aken lantas masoek pengadoean pada pamerentah agoeng atas koeihoe poenja kateledoran dan tida tjakep dalem hal melakoeken kaoe poenja kewadjiban.“
