— 19 —
kaloe sampe kepergokan orang, akoe tida koewatir dikenalin orang.“
Kaoe selamanja bekerdja dengen hati hati sekali toako,“ kata Ouw Koei Boen.
Goei Soei Hong tertawa sebagi djoega soewaranja boeroeng tjoelik-tjoelik.
„Kaloe akoe tida senantiasa berhati-hati, masatah akoe bisa tinggal slamat sampe ini hari!“ kata ia dengen soewara bangga.
Begitoelah iaorang omong-omong dengen asik, hingga tida merasa lagi soeda sampe di deket Tjip-lioe-tan. Goei Soei Hong berbangkit dari iapoejna tempat doedoek dan mamerentah.
„Toeroenken lajar!“ kata ia. „Kamoedian pertahanken kaoe orang poenja penggajoe soepaja djalannja praoe djadi perlahan. Di deket tempat jang aernja deres, kir-kira terpisa limapoeloeh kaki djaoenja, moest tahan ini praoe djangan sampe terbawa oleh alirannja aer ka itoe tempat jang deres, sebab boeat balikin lagi ka sini aken memakan tempo terlaloe lama hingga achirnja kita aken djadi kasiangan.“
Itoe semoea prentah dilakoeken dengen betoel. Sepandjang itoe waktoe Goei Soei Hong preksa itoe goeloengan-goeloengan tiker jang sama sekali berdjoembla ampat, kerna saban goeloengnja ada tergoeloeng tiga orang. Achirnja Goei Soei Hong dengen terbantoe oleh It Kie Tho boekaken satoe antaranja, jang ternjata ada terisi Tio Beng bersama iapoenja doewa penggawe. Paling doeloe Tio Beng poenja tali ringkoesan dilepasken, kamoedian dengen perlahan ditjemploengken ka dalem soengei oleh itoe doewa pendjahat. Blakangan itoe doea penggawe poen dapet giliran disoeroe „mandi“ ka dalem aernja itoe soengei jang dingin.
