22
saja blon taoe liat kipas itoe di tangannja. Dan lagi itoe hoeroef boekan ada namanja.
Soenggoe-soenggoe di itoe kipas ada teroekir satoe hoeroef jang njata sekali dan maskipoen ada penoe dengan dara, maka bole dapat taoe jang itoe boekan jang di boenoe poenja.
Kaloe bagitoe ini kipas ada pemboenoe jang poenja, — berkata kapala policie itoe. Djanganlah ilang pengharapan bapa! baik bilang trima kasi jang kita soeda dapat ini kipas jang mana boleh menoendjoek pemboenoehnja anakmoe tentoe nanti membalas.
Fo-Hop kasi ini kipas kapada satoe dari pengikoetnja dan pergi masoek kadalam roema Lin.
Kamar itoe masi djoega ada terlamboeran seperti bagimana waktoe jang Lin masoek kadalamnja dan membawa kaloear mantoe prampoeannja.
Kapala policie itoe pareksa samoea dengan ingat-ingat, bikin banjak toelisan dan moelai pareksa itoe baboe-baboe.
Samoea baboe-baboe poenja tjarita tiada ada berbeda satoe dengan lain. Pada waktoe tenga malam dia-orang soeda dengar ada orang ketok pintoe maka Liou Siou soeda boekakan itoe boeat lakinja, jang mana dia-orang soeda kenalkan padanja dari pakeannja jang bagoes, maskipoen itoe tampat, dimana dia-orang ada bernanti tiada bagitoe trang dan djoega lagi maski Liou Siou itoe ada berpake kain toetoep moeka, maka dia-orang sasoedanja meliat itoe samoea lantas berlaloe dari pada tampat itoe.
