brenti menioep, plahan-plahan tjakrawala seblah wetan tertampak moelai sinarken tjahja mas kerna sang Batara Soerja moelai aken terbit. Kemoedian, kapan sang matahari soedah terbit, Tjiap laloe mendjerit: „'Ntji, kenapa matakoe mendadak begini boenar dan tida dapet menampak apa-apa? Dan kenapa toeboehkoe terasa begini lemes?"
„Djangan kaget, 'dék; ini tandanja kita moesti mengaso....." saoetnja Tjiat dan laloe toentoen Tjiap ka bawahnja itoe poehoen weringin jang gompiok dan ajoep, jang terletak tida djaoeh dari sitoe.
T I O N G - G I E sadjek terdjadi itoe drama atawa tragedie jang tragisch, ia lantas soeka menang-menoeng sendirian seperti orang jang keilangan soemanget.
Saben kali matanja soeka membajangken romannja Tjiap jang moengil, koepingnja koemandangken soearanja Tjiap jang merdoe, teroetama itoe oetjapan: 'Tjioeman kaoe ini ada jang pertama, tapi djoega jang pengabisan....' Atawa djika tida demikian, dalem tidoernja ia sering dapet impian ketemoe kepada Tjiap, bertjanda atawa bergoejonan, peloek ia atawa tjioem bibirnja, dengen bibir itoe terasanja masih menggenggem sari madoe dan tertampaknja masih
