Djika seorang keilangan seorang toea jang soedah kaké atawa nènè, ia tida aken kliwat bersedih, kerna itoe soedah kemoestian, seorang jang soedah lojo, ditarik kombali oleh Toehan dileboer dalem boemi, boeat dibaroeken kombali mendjadi satoe baji.
Tapi marika keilangan satoe Tjiap, jang masih moeda, masih banjak koetika boeat pandeng goemilangnja doenia ―― djika doenia itoe goemilang ―― dan boeat itjipin manisnja penghidoepan —— djika penghidoepan itoe sari madoe!
Administrateur dari Pasir Mas telah kasihken itoe satoe tanah kosong, sebelah itoe koeboeran Indonesier, boeat tempat mengasoh dari lajonnja Tjiap.
Koeboerannja Tjiap oleh Tiong-gie ditanemin kembang-kembang jang di masa hidoepnja Tjiap sanget soekaken.
Kenapa Tjiap jang sedeng moedanja, sedeng tjantiknja dan sedeng tjentilnja telah ambil itoe poetoesan pendek?
Pada tatkala pertama bertemoe dengen Tiong-gie, dalem sanoebarinja Tjiap telah terbit perobahan besar. Dalem otaknja laloe tersimpan millioenan perkata'an jang moeloek tentang dirinja Tiong-gie dan dalem hatinja tersimpan laksa'an gambarnja itoe pemoeda.
