kaoe, terdjedjer dan tertantjep dalem itoe vaas, aloes sebagi soetra dan koening sebagi mas....
Tjiap melirik dan kata; „Akoe tida poenja oewang cents........"
Dan Tjiap lantas tinggalken itoe kamar, kerna ia moesti isiken itoe laen-laen vaas jang masih kosong dengen kembang.
Beromong-omong, bertjanda, saling pojok, saling patjok dan sebaginja, atjapkali terdjadi antara pengisi itoe roemah, jang masih moeda danjang masih anak-anak.
Satoe tempo, Tjiap kepaksa moesti tjoebit pahanja iapoenja adé, si Liong-tong, kerna ini adé dalem goejonan brani menjeboet Tjiap dengen seboetan ,,'ntjim Tiong-gie".
Tiong-gie itoe waktoe kebetoelan poelang dari kantoor dan menampak itoe.
„Ai, kenapa berklai?" katanja Tiong-gie.
„Ia koerang adjar, kataken akoe 'ntjim........" saoetnja Tjiap dan tida landjoetken.
„Si Tong kataken ia........ 'Ntjim Tiong-gie........ dan ia marah...." 'ntjim Hok-soei, iboenja Tjiap, ikoet menimbroeng kata.
„Ai, tjoema begitoe sadja, masa lantas ilang kaoe poenja idoeng, Tjiap........!"
Tjiap tida kata lagi, hanja lari masoek dalem roemah.
