— 1860 —
Tjoba pikir apa patoet begitoe?"
Monte Christo toetoep matanja, sebab hatinja terlaloe keras tergerak. Dia ingat, dia masih merasah itoe karoeng memboengkoes badannja, ia merasa dinginnja bekas mait di dalem karoeng itoe, koetika moekanja katoetoepan sama sekali.
Maka berkata poela djoeroe koentji: „Toewan taoe apa maksoednja? Dia itoe kira, ijang orang-orang toetoepan, kaloe mati di tanem di kasteel dan sebab dia kira, ijang orang tentoe tida maoe kaloewarin ongkos peti boewat orang-orang ijang mati, maka gampanglah dia bisa, maoe angkat tanah oeroekkan itoe sama poendaknja, dan dia bisa kaloewar; tetapi kasian, dia tida taoe, ijang adat biasa di kasteel menjegah maksoednja, oleh kerna orang mati di pendjara ini tida di koeboer, tetapi di kasi masoek di dalem karoeng, kakinja di gandoelin pelor ijang berat, abis mait itoe di boewang dari atas ka dalem laoet. Djadi dia itoepoen di boewanglah dari atas ka dalem laoet, dan besokan paginja orang dapetin, ijang soenggoeh-soenggoeh mait itoe di dalem tempat tidoernja. Serta kadengaran hal ini, maka orang-orang ijang di prentaken memboewang itoe mait, telah baroe mengarti, kenapa dia orang dengar soewara orang mendjerit di dalem itoe karoeng, koetika itoe karoeng di lempar ka dalem laoet, tetapi dia orang tida maoe tjerita apa-apa."
Aken disamboeng.
