GANDJARAN JANG PANTES
51
Begimana girangnja itoe iboe dan anak waktoe di itoe hari Hok poelang dan kasi taoe pada iboenja, bahoea sekarang ia soeda dapet pakerdja'an jang membri hasil toedjoepoeloeh lima roepia. Kombali itoe iboe dan anak memoedji kamoerahannja Toehan, jang briken marika redjeki!
Hok tjoema bekerdja sebagi chauffeur satoe boelan sadja. Saliwatnja itoe waktoe ia diperbantoeken pada penggawe toko dan djikaloe ada orang jang ingin membeli auto baroe, tentoelah si Hok jang diprentah tjoba kandara'an jang bakal didjoeal. la poenja pladjaran ternjata ada djadi satoe fatsal jang bergoena sekali, kerna orang-orang Europa jang hendak membeli auto mendjadi soeka sekali djikaloe mendenger jang itoe chauffeur boekan sadja pande dan terliti pegang stuur, tapi djoega bisa diadjak bitjara sepandjang djalan. Tapi Hok tida poeas dengen dapet itoe kadoedoekan. Tiga boelan kamoedian, sebagi tanda jang ia poenja pakerdja'an dihargaken, si Hok poenja gadjih ditambah sampe djadi seratoes doeapoeloeh lima roepia, tapi Hok njataken, ia ingin bekerdja dalem bengkel soepaja ia bisa mengenal betoel masing-masing auto. Begitoelah djikaloe ia poenja tenaga tida perloe dipake di loear, ia berada dalem bengkel, di mana ia tida segan boeat lakoeken pakerdja'an jang paling kotor. Laen dari itoe ia memang soeka sekali pada masin-masin, teroetama motor auto dan speda motor. Tidalah mengheranken jang dalem sedi kit waktoe sadja. Hok soeda bisa betoelken segala karoesakan jang bisa terdapet pada masinnja satoe auto dalem perdjalanan, katjoeali djikaloe itoe karoesakan beroepa patahnja satoe atawa laen bagian jang tida bisa dibetoelin zonder pekakas.
Sekarang Hok poenja bintang moelai djadi terang.
