GANDJARAN JANG PANTES
29
kali sentak, itoe lelaki terpaksa moesti lepasken Gwat Nio dan djadi terlempar kira-kira tiga meter djaoehnja dan achirnja ia djatoh di tanah.
Gwat Nio jang goemeteran djadi heran meliat itoe kedjadian jang mendadak dan waktoe ia menengok, ternjata di depannja berdiri satoe lelaki jang tjoema memake tjelana tidoer dan satoe badjoe djas. Orang itoe sama sekali tida memake sepatoe atawa topi.
„Ma'af nona, satoe nona minta akoe tjari kaoe berdoea. la menoenggoe di ia poenja auto, ka mana ia minta anter kaoe berdoea, djikaloe soeda diketemoeken."
„Ja, marilah kita pergi." kata Gwat Nio. „Liong Nio, hajo ikoet."
Liong Nio dan pengiringnja moendoer madjoe, tapi achirnja Liong Nio lepasken diri dari ia poenja penganter dan mengikoet pada Gwat Nio, samentara itoe lelaki laloe hampirken itoe kawan jang masih menggiepok di roempoet.
„Siapa adanja itoe badjingan?" tanja itoe orang jang tadi hendak ganggoe Gwat Nio.
„Akoe tida taoe, kata kawannja, „akoe kira satoe chauffeur atawa knecht taxi. Akoe denger ia bilang, satoe gadis menoenggoe itoe doea gadis dan minta marika mengikoet."
„Marilah kita soesoel padanja."
„Dan?"
„Akoe maoe kasi adjaran padanja."
Itoe doea orang laloeh menjoesoel dan kebetoelan sekali baroe sadja si Hok hendak borlaloeh dari damping autonja Sien Nio, marika sampe.
„Kaoe jang serang akoe tadi?" kata itoe orang jang telah rasaken begimana besar adanja tenaganja si Hok.
„Betoel," djawab si Hok.
