— 77 —
moeda minta, soepaja itoe malem iaorang boleh tinggal sama sama, perminta’an mana telah diloeloesken.
Satoe tenda dibikin sedia boeat iaorang di seblanja tenda maarschalk. Maski itoe hari iaorang soeda djalan djaoe dan banjak bekerdja, iaorang tiada ingin tidoer. Memang biasanja pada malem sablonnja satoe perkara prang dimaloemken orang orang militair biasanja tiada bisa tidoer poeles, apapoela ini doea anak moeda jang baroe pertama kali maoe toeroet berklai.
Pada waktoe begitoe orang dapet inget lagi bebrapa perkara lebi doeloe soeda lama diloepaken. Pada waktoe orang maoe pergi maloemken perkara prang ada sama sebagi orang maoe pergi di satoe tempat, dari mana blon tentoe ia bisa poelang kombali, orang orang jang lebi doeloe tiada dikenal asal. ia tiada berfihak pada moesoe lantes dianggep sebagi sobat, dan kita poenja sobat sobat dipandang sebagi soedara. Tentoe tiada oesa dibilang lagi, pada waktoe begitoe kita poenja hati pikirken banjak roepa perkara.
Begitoe djoega soeda kedjadian dengen itoe doea anak moeda, kerna baroe sadja iaorang masoek dalem tempatnja, masing masing lantes kaloearken kertas dengen potlood dan doedoek menoelis soerat.
Soerat jang iaorang toelis ada sanget pandjang, ampat moeka dari itoe kertas soeda penoe dan di sela sela toelisan ditamba lagi bebrapa perkata’an. Kadang kadang ini doea sobat awasin satoe pada laen dan djadi ketawa dengen tiada oesa berkata satoe apa, iaorang soeda mengarti satoe pada laen.
