— 56 —
soeka liat; ia kasi tanda pada toean roema makan boeat toeroet padanja, bajar dengen rojaal apa jang ia soeda minoem dan dahar, kamoedian ia naek lagi koedanja.
Bermoela Grimaud ada niat boeat lantes balik ka Parijs, tapi ia pikir, Raoul nanti djadi boeat pikiran kenapa ia blon dateng menjoesoel ; ia pikir lagi, itoe anak moeda tiada bebrapa djaoe lagi adanja dari itoe tempat, tjoema doea mijl sadja dan djikaloe ia pergi ketemoeken lebi doeloe dan balik kombali, paling banjak ia bikin ilang tempo satoe djem lamanja. Lantaran berpikir begitoe Grimaud lantes lariken koedanja dan sapoeloe minuut kamoedian ia soeda brenti di depan satoe roema makan di Mazingarbe, satoe doesoen di mana tiada ada laen roema makan lagi.
Dari toean roema makan ia lantes dapet ketrangan ada orang moeda bangsawan brenti di sana dan ia doega, tentoe ia soeda dapet soesoel toeanja.
Raoul ada keliatan doedoek di satoe medja dengen graaf de Guiche dan toean d’Arminges; roepa roepanja bebrapa perkara jang iaorang soeda dapetken itoe hari telah bikin iaorang jadi tiada begitoe senang hati sebagimana biasa, sedeng toean d’Arminges, jang soeda biasa dapetken roepa roepa perkara ngeri, tiada bisa bikin itoe anak anak moeda dapet loepaken itoe perkara.
Pintoe kamar diboeka dan Grimaud dengen moeka poetjet, pakeannja penoe dengen aboe dan dara dari loekanja itoe algodjo, dateng masoek,
„Grimaud, Grimaud,“ treak Raoul, „kau baroe
