— 36 —
bebareng dengen itoe padri jang dateng dari laen djoeroesan ; ini doea anak moeda minggir boeat kasi djalan pada orang orang jang pikoel gotongan, sedeng padri toeroen dari kaldenja dan prenta orang bawa itoe kalde di istal.
,,Toean padri," kata de Guiche, ,,toeloeng ini orang dan djangan pikir perkara apa jang kau maoe pake atawa dahar di sini, semoea soeda dibajar."
,,Trima kasi, toean,* kata itoe padri dengen tersenjoem meringis.
,,Mari kita brangkat, graaf," kata Raoul, ,,jang rasa badannja djadi koerang senang apabila ia ada deket pada itoe padri.“
,,Lagi sekali, banjak trima kasi, toean toean bangsawan,” itoe orang jang loeka mengoetjap.
,,Slamet tinggal!" kata de Guiche jang lantes lariken koedanja, kerna Bragelonne soeda djalan lebi doeloe.
Koetika itoe gotongan dibawa masoek, istrinja toean roema makan soeda kaloear boeat bantoe soeaminja. Itoe orang jang loeka roepa roepanja rasaken banjak sakit, kerna ia merinti kras, maski begitoe ia ingin liat djoega apa itoe padri ada toeroet masoek, maka ia angkat kepalanja.
Koetika dapet liat itoe orang poenja moeka jang poetjet dengen penoe dara njonja roema makan pegang dengen kras tangan soeaminja.
,,Kenapa?" menanja toean roema makan, ,,apa kau maoe pangsan lantaran liat moekanja itoe orang?"
,,Boekan, tapi tjoba kau liat,* djawab istrinja.
,,Ja, kata soeaminja," roepa roepanja ia poenja loeka ada sanget brat."
,,Akoe boekan bilang begitoe," Kata istrinja, akoe maoe tanja, apa kau kenalken itoe orang?"
