— 331 —
Musketier jang djaga kreta toeroen dari bok.
„Toean," kata d'Artagnan padanja, „kau pergi lepas kau poenja kawan jang djaga itoe koesir, kamoedian kau berdoea naek koeda pergi di hotel de Ree di Tiquetonne straat. Di sana kau ambil akoe poenja koeda dan koedanja toean du Vallon jang kau moesti selaken dengen lengkep, bawa itoe doea koeda kaloear dari kota Parijs ka Cours la Reine. Djikaloe di sana soeda tiada ada orang lagi, kau bawa teroes ka Saint Germain. Itoe semoea ada prentanja Radja."
Musketier kasi hormat dan pergi boeat djalanken itoe prenta.
D'Artagnan naek di bok.
Di pinggangnja ada doea pistol, di betoelan kakinja satoe snapan dan di blakangnja satoe pedang terhoenoes.
Ratoe Anna dateng, di blakangnja ada toeroet Radja Lodewijk dan hertog van Anjou, Radja poenja soedara.
„Kretanja toean coadjutor!” berseroe Ratoe Anna dengen moendoer lagi.
„Ja, njonja,” kata d'Artagnan; „djangan kwatir, naek sadja, akoe jang djadi koesirnja.
Ratoe Anna djadi heran sakedjep dan naek masoek dalem kreta. Radja dan Monsieur naek blakangan, iaorang doedoek di kanan dan kiri dari iaorang poenja iboe.
„Laporte, kau boleh toeroet," kata Ratoe Anna.
— „Begimana, njonja! dalem satoe kreta dengen Sri Ratoe ?"
— „Ini malem tiada perloe dipake atoeran kahormatan, tapi perloenja boeat toeloeng Radja. Naek Laporte."
Laporte toeroet prenta.
