— 306 —
— „Apa Bernouin tiada toeroet djoega?“
— „Tiada ada tempat boeat Bernouin, ia nanti menjoesoel blakangan.“
— „Mari kita brangkat, kerna akoe moesti toeroet sadja kau poenja maoe.“
„Monseigneur," kata d’Artagnan, „masi ada tempo boeat moendoer den Monseigneur ada vrij boeat berboeat begitoe.“
„Tiada, tiada“ berseroe Mazarin. „Mari kita djalan.“
Berdoea iaorang djalan dari itoe tangga resia, sedeng Mazarin bersender pada d’Artagnan jang dapet rasa Kardinaal gemeter.
Iaorang djalan liwat kebon astana, di mana masi ada menoenggoe bebrapa kreta dari tetamoe jang blon poelang, teroes menoedjoe ka pintoe ketjil.
Mazarin maoe boeka itoe pintoe dengen koentji jang ia kasi kaloear dari sakoenja, tapi ia poenja tangan gemeter, hingga ia tiada bisa kasi masoek itoe koentji dalem lobangnja.
„Kasi akoe,“ kata d’Artagnan.
Kardinaal seraken itoe koentji, D’Artagnan boeka pintoe, koentji lagi dan kasi masoek koentji dalem sakoenja. Ia niat balik ka dalem astana dengen ambil itoe djalan.
Pintoe kreta soeda diboeka dan Mousqueton ada menoenggoe di sampingnja, Porthos soeda ada doedoek dalem kreta
„Masoek, Monseigneur!“ kata d’Artagnan
Mazarin tiada perloe di tegor sampe doea kali, ia lantes lompat masoek dan kamoedian d’Artagnan doedoek di sampingnja; Mousqueton toetoep pintoe kreta dan dengen merinti ia naek diblakang. Mousqueton soeda bikin kebratan boeat toeroet dalem ini perdjalanan, kerna
