— 247 —
kota Saint Honore dan sepandjangnja itoe barrikaden ada bebrapa poeloe riboe orang bersendjata; iaorang tantangin soldadoe soldadoe
jang djaga di astana karadja'an, tapi itoe soldadoe ada dalem pekarangan astana jang pintoe heknja ditoetoep. Samentara bebrapa
koempoelan dari kira kira saratoes sampe doea ratoes orang jang pengawakannja koeroes dan Boeda lela serta moekanja poetjet dengen berpake pakean roesak djalan koeliling dengen bawa satoe potong kertas di'iket di kajoe sebagi bendera, di mana ada ditoelis begini: „Saksiken kasengsara'an rahajat negri!" Di mana sadja ini barisan sampe disamboet dengen tampik soerak dan kerna ada banjak barisan begitoe roepa, soeara soerak djadi sanget rioe kadengerannja.
Itoe pagi Ratoe Anna dan Mazarin boekan maen kagetnja koetika orang wartaken padanja, rahajat kota Parijs jang kemaren sorenja masi sebagimana biasa, itoe pagi soeda brontak dan bikin begitoe banjak riboet, Oleh kerna itoe, baek Ratoe Anna, baek Mazarin, tiada maoe pertjaja itoe kabar dan ingin denger dan liat sendiri. Iaorang boeka satoe djendela; iaorang lantes dapet denger itoe soeara riboet dan dapet liat keada'an dalem kota soeda beroba.
Mazarin angkat poendaknja dan berlakoe sebagi ia pandang renda itoe pembrontakan, tapi moekanja soeda djadi sanget poetjet dan dengen tjepet ia pergi di kamar toelisnja, di mana ia lantes koempoel oewang dan mas intennja, semboeniken di satoe tempat resia, sedeng bebrapa tjintjin jang berharga ia pake di djeridjinja. Sri Ratoe jang ditinggal saorang diri djadi semingkin mara; maarschalk de la
