— 179 —
kamoedian koeli koeli jang bawa barang dan baroe iaorang bertiga toeroen.
Itoe koetika Athos dapet liat satoe orang djalan dengen tjepet di tembak pinggir plaboean di sebrang dari tempat, di mana iaorang ada dan dari itoe tempat jang kira kira doeapoeloe tindaknja djaoe itoe orang awasin iaorang toeroen praoe.
Maski hawa oedara soeda djadi semingkin gelap, Athos rasa kenalin itoe orang ada itoe anak moeda jang baroesan soeda bitjara padanja.
„Boleh djadi betoel ja ada djadi satoe spion jang maoe tjega kita brangkat,“ Athos pikir dalem hatinja.
Tapi seandenja itoe orang betoel ada niat berboeat begitoe roepa, itoe koetika ia soeda tiada bisa tjega lagi, maka dengen tindakan plahan Athos toeroen tangga hampirken praoenja.
„Itoe orang betoel intip kita,“ kata Athos, „tapi ia biarken sadja kita brangkat, djikaloe kita soeda ada di tenga laoet, begimana ia nanti bisa kedjer lagi pada kita.“
Seabisnja berkata begitoe Athos lompat di praoe jang soeda moelai ditoelak dari pinggir dan lantes digajoe kras oleh ampat orang.
Tapi itoe anak moeda soeda djalan lebi doeloe dipinggir tembok plaboean dan toeroet djalan dengen itoe praoe. Di betoelan tikoengan maoe kaloear dari plaboean, itoe praoe moesti liwat deket satoe potong tembok jang ada monjondol kaloear. Itoe anak moeda djalan lebi doeloe ka itoe tembok di mana ia menoenggoe, roepa roepanja boeat liat dengen teges, siapa adanja orang orang jang ada dalem itoe praoe.
„Demi kahormatankoe!“ kata Aramis pada
