— 146 —
„O! toean,“ kata Raoul dengen kaget, „itoe perkata’an bikin akoe inget satoe perkara, jang lantaran ingin tjeritaken perkara prang, akoe soeda diadi loepa. Pada Sri Baginda Ratoe dari negri Inggris ada saorang bangsawan jang telah djadi girang roepanja koetika ia denger akoe seboet toean poenja nama. Ia bilang, ia ada satoe sobat dari toean, tanja toean poenja adres dan kasi taoe, ia maoe dateng tjari toean.“"
—„Siapa namanja?“
—„Akoe tiada brani tanja namanja, toean; tapi maski ia pande bitjara bahasa Frans, akoe denger swaranja sebagi saorang Inggris.“
„Begitoe!“ kata Athos dengen swara plaban.
Ia toendoeken kepalanja boeat berpikir siapa adanja itoe orang jang anggep dirinja sebagi ja poenja sobat. Koetika ja angkat kepalanja ia kaget dapet liat saorang berdiri di betoelan pintoe jang tiada ditoetoep rapet, itoe orang lagi awasin padanja.
„Lord de Winter!“ bertreak Athos.
„Athos, sobatkoe!“ kata Lord Winter.
Ini doea orang bangsawan peloek satoe pada laen bebrepa lamanja, kamoedian Athos pegang de Winter poenja kadoea tangan, dengen awasin sobatnja poenja moeka ia tanja:
„Apa sebab, Mylord, sedeng akoe lagi merasa senang hati, kau poenja roepa ada sebagi orang kesel?“
„Ja, sobat, kau soeda doega betoel dan akoe maoe bilang lagi.“ kata itoe Lord, „kau poenja keada’an bikin akoe djadi kwatir.“
De Winter liat keada’an dalem itoe kamar sebagi ia maoe tjari satoe tempat jang soenji, Reoul koetika dapet liat begitoe lantes doega,
