— 111 —
perloe bikin aman negrinja, soepaja bisa oesir ia poenja Radja. Orang Frans djoega perloe djaga keaman negrinja, soepaja bisa bikin tetep tachta karadja’annja boeat ia poenja Radja jang masi moeda; djadi kau poenja kaperloean ada sama dengen apa jang kita lagi berdaja dan brangkali sigra nanti berasil.
„Kau bertjektjokan dengen parlement dan ada tjidra dengen sekalian kaoem bangsawan jang sekarang maloemken prang boeat kau, tapi kamoedian nanti menjerang pada kau, rahajat negri sanget berbanta, kerna diasoet oleh coadjutor, president Blancmesnil dan raadsheer Broussel; pendeknja kekaloetan dalem negri sampe bikin banjak soesa pada kau dan bikin kau tiada soeka dapet lagi stori dengen laen bangsa; kerna djikaloe sampe dapet tjidra dengen orang Inggris, rahajat negri di sini, jang memang soeda soeka berklai radja, tentoe nanti djadi sariket dengen orang Spanjol, kau poenja moesoe, pada siapa kau sekarang masi maloemken prang dan nanti sanget soeka trima kita djadi ia poenja pembantoe. Tapi akoe taoe, kau ada saorang jang sanget ati ati dan hargaken tinggi kau poenja deradjat jang sekarang, lantaran mana kau tentoe lebi soeka sadja pamerentahan sendiri dan biarken orang Inggris poenja pakerdja’an dibikin slese sendiri. Kita tjoema ingin, Kau djangan kasi Radja Karel naek di kau poenja negri dan djangan toeloeng padanja dengen oewang, bala-tentara atawa apa djoega, kerna ia ada satoe orang asing boeat kau poenja negri.
