343
Sasoedahnja Bwee Liang Giok pergi, tidak sabrapa lama, Touw Sin lantas bikin baik koeboerannja Hi Tong, sabagimana Bwee Liang Giok soedah printah.
Di belakang kali Touw Sin itoe ada dapet tiga anak lelaki. Jang satoe, jaitoe jang kadoewa dia akoein djadi anaknja Hi Tong dan kasih nama Ong Tian Sik pada anak itoe. Itoe tiga anak, sasoedahnja djadi besar, semoewa ada djadi djoega poenggawa negri.
Tempo Bwee Liang Giok poelang dan soedah sampe di Kota-Radja, dia lantas madep pada Radja dan serahken segala soerat dari perkara-perkara jang dia soedah priksa. Maha Radja priksa socrat-soerat itoe dengen seneng di hati, dan itoe hari djoega Bwee Liang Giok lantas di pangkatin lagi lebih besar dengen di koerniaken nama Thaij Tjoe Siauw Po Ho Tian Thaij Hak Soe (Tjaijsiang). Radja lantas berkata djoega padanja: Sekarang kami maoe soeroeh Kimthiankam tjari hari jang baik boewat kaoe poenja hari kawin.
Bwee Liang Giok lantas membilang banjak trima kasih pada Radja, dan sasoedahnja Radja masoek ka dalem, dia lantas djalan poelang. Tempo sampe di astana, dia kasih taoe pada iboenja, jang dia soedah angkat Touw Sin djadi tikoan di Gi Tin Koan dan soedah soeroeh oeroes boewat bikin betoel Hi Tong poenja koeboeran; dia kasih taoe djoega, jang
