333
Tjhat Ie.
Houw Loan lantas tjepet-tjepet toekar pakean lain, teroes naik djoli dan brangkat pergi. Tempo sampe di depan pintoe kantoor Tjhat Ie, dia dapet denger rame sekali boeni-boenian tanda kabesaran, dan baroe sadja dia toeroen dari djoli, lantas ada orang kasih taoe padanja, jang An Ie taijdjin minta dia dateng mengadep. Dengen lekas dia lantas masoek dan mengadep pada Bwee Liang Giok, dengen berloetoet membri hormat. Sasoedahnja itoe, dia lantas berdiri dengen toendoek kepala.
Bwee Liang Giok lantas tanjak padanja, katanja: Apa kaoe ada tikoan dari Gi Tin Koan jang baroe diangkat djadi tihoe disini? Houw Loan menjahoet: Betoel begitoe, sebagimana taijdjin bilang.
Bwee Liang Giok lantas berkata: Kami lihat kaoe poenja roepa seperti saorang jang bingoeng. Brangkali kaoe ada kahilangan apa2.
Houw Loan menjahoet: Saja soedah denger dengen sakoenjoeng-koenjoeng, jang taijdjin soedah dateng di sini; dari itoe saja djadi ada sedikit kaget. Tidak ada lain sebab apa².
Bwee Liang Giok lantas berkata: Apa kaoe sekarang soedah dapet mantoe jang tjakep dan pinter?
Houw Loan denger pertanjakan itoe, dia djadi tidak bisa menjahoet dan tinggal dijem.
