330
lantas niat brenti sebentaran di sitoe.
Dia lantas pesen sama itoe boedak jang ikoet padanja, bahoewa boedak itoe misti berbasa sadja padanja: Siangkong, soepaja rasia boleh tinggal tertoetoep. Sasampenja di depan itoe bio, Bwee Liang Giok lantas dapet lihat pintoe bio itoe terkoentji; hatinja djadi merasa heran aken hal itoe, sebab satoe bio biasa terpentang sadja pintoenja, dan segala orang boleh kaloewar-masoek. Salagi dia inget begitoe, dia dapet lihat di pintoe jang tertoetoep itoe, ada tertempel salembar soerat, boeninja:
Kami, Ti Hoe dari ini kota, kasih taoe
dengen ini pada semoewa orang, baho-
ewa tidak saorang boleh masoek dalem ini
bio. Siapa brani langgar ini printah, nan-
ti dapet trima hoekoeman dari kami.
Sasoedahnja Bwee Liang Giok batja soerat itoe, hatinja lantas rasa, tentoe misti ada perkara apa-apa. Dia inget maoe lantas ketok pintoe itoe; tapi dia lantas oeroengken niat nja, sebab dia rasa, brangkali nanti djadi koerang baik. Dia lantas tjobak sadja djalan berpoeter aken dateng di belakang itoe bio, dan dia lantas lihat satoe pintoe jang terboeka sedikit. Dia lantas masoek di pintoe itoe dan teroes ka dalem, tapi dia tidak bertemoe satoe orang atawa satoe Hwee Sio. Sasoedahnja dia djalan teroes-meneroes, dia lantas da-
