312
melinken lantas sadja kasih printah, soepaja orang djepit kakinja Louw Kie serta Oeij Siong itoe berdoewa. Sekalian hamba dari kantoor Samhoatsi lantas boeka itoe doewa orang poenja pakean kabesaran, lepasken marika poenja sepatoe, dan lantas moelain djepit doewa-doewa lantas triak sakoewat-koewatnja.
Pang Lok Thian lantas tanjak kombali pada marika itoe, kaloek-kaloek sekarang dia orang maoe akoe dosanja. Doewa-doewa menjahoet jang dia-orang tiada ampoenja salah. Maka Pang Lok Thian lantas kasih printah lagi, soepaja djepit marika itoe lebih keras. Sasoedahnja itoe, Pang Lok Thian lantas tanjak kombali, apa maoe mengakoe atawa tidak. Louw Kie dan Oeij Siong tidak menjahoet; tapi jang djepit padanja lantas kasih taoe, jang orang berdoewa itoe ada kalenger. Pang Lok Thian lantas kasih printah boewat siram ajer di kepalanja Louw Kie dan Oeij Siong itoe. Tidak brapa lama, Louw Kie dan Oeij Siong lantas moelain inget dan triak-triak kombali. Oeij Siong lantas berkata pada Louw Kie: Entia! Kita-orang tidak nanti bisa tahan siksaan ini; lebih baik kita-orang mengakoe sadja.
Louw Kie lantas berkata: Apa boleh boeat! Taijdjin saja minta taijdjin soeroeh lepas ini djepitan; kita-orang nanti akoe semoewa, toeroet taijdjin poenja maoe.
