30
(tioki) di Tianglokthian. Harep Sinsiang lekas dateng di sana, sebab Baginda Radja soedah menoenggoe.
Lauw Kie bilang: Kaoe djalan lebih doeloe dan toenggoe di sana; sebentar kami lantas dateng.
Itoe soeroehan lantas djalan djalan pergi dan menoenggoe di pintoe Kraton datengnja Louw Kie. Tempoe itoe soeroehan Radja soedah pergi, Louw Kie lantas masoek di kamar toelis, toelis satoe thiap dan lantas masoekin di sakoe badjoenja: kamoedian teroes dia naik djoli pergi ka Kraton. Sasampenja di pintoe Kraton dia lantas bertemoe itoe soeroehan jang tadi, dan lantas dia di adjak masoek bertemoe Radja Tianglokthian. Radja lihat dia dateng, lantas berkata: Ini hari kabetoelan lagi seneng, tida perkara apa-apa; baik kita orang main main tjatoer boewat plesir sedikit.
Habis bilang bagitoe Baginda lantas soeroeh orangnja kasih korsi pada Sinsiang. Sinsiang lantas doedoek dengen bilang trima kasih dan lantas moelain main. Dengen sengadja Sinsiang bikin mainnja djadi kalah sampe doewa kali. Baginda lantas tanjak: Ini hari Sinsiang kenapa main seperti orang jang tida seneng? Apa sebabnja?—
Louw Kie bangoen, lantas berloetoet dan berkata : Hamba lagi pikiran perkara negri
