301
Tempo djolinja Louw Kie soedah sampe di depan astana, pengikoetnja berkata pada orang-orang jang maoe bikin roesoeh itoe: Kaoe orang-orang apa ini? Apa kaoe tidak taoe ini djoli Sin Siang, maka kaoe brani riboet-riboet?
Itoe orang banjak menjahoet: Ha! Bagoes! Kabetoelan sekali! Memang soedah lama kita-orang menoenggoe di sini!
Sembari bilang begitoe, orang-orang itoe lantas sadja moelain labrak sekalian pengikoetnja Louw Kie, jang dari sebab tiada tahan, lantas sadja pergi lari, tinggalken diaorang poenja toewan sama-sama djolinja. Louw Kie denger riboet-riboet, dia djadi sanget kaget; tapi baroe sadja dia maoe menanjak apa-apa, orang lantas tarik dia kaloewar dari djoli dan labrak padanja rame-rame. Sedeng Louw Kie lagi dihebatin dan triak-triak, Oeij Siong dateng dengen djoli. Dia lihat riboet-riboet begitoe, lantas dia menempo ka loewar dari djolinja; tapi beloen sampe dia boeka moeloet boewat tanjak apa-apa, ― itoe orang-orang jang bikin roesoeh, banjak jang soedah angkat tangan menoendjoek padanja, dengen berkata: „Ha! Ini satoe lagi!“ dan begitoe djoega lantas Oeij Siong ditarik dari dalem djolinja ka loewar dan dihebatin kalang-kaboet, sampe dia bekaok-kaok sakoewat-koewat.
Bebrapa poenggawa, jang ada di dalem astana menoenggoe datengnja Maha-Radja, se-
