22
ingetan, boewat ini doewa perkara misti boenoeh lebih doeloe itoe Louw Kie dan Oeij-Siong, dan lantas angkat kombali satoe Tjong-ping boewat djaga kasenangan orang-orang ketjil di Hongtotiu, dan bantoe kombali toeloengan beras pada orang-orang di Tattan seperti doeloe. Kaloe dibikin bagitoe, temtoe segala hoeroe-hara djadi brenti dan negri djadi seneng kombali.
Pang Lok Thiau menjahoet: Soedara poenja timbangan samoewa baik; tapi barangkali Maha Radja tida socka toeroet, kerna sering-sering kaloe orang kasih taoe atoeran jang baik, Maha Radja tida pertjaja baiknja. Kaloe kita orang kasih masoek soerat, tantoe Radja kasih Louw Kie priksa. Dia poen memang ditjinta sekali oleh Maha Radja; tantoe tida bergoena kita bikin apa-apa. Maka itoe kita-orang samoewa soedah diam sadja, tida maoe berbantah sama Radja.
Bwee Kwee dengar bagitoe. lantas bangoen dengan goesar dan berkata: Sekarang njata sekali pada saja, jang soedara-soedara samoewa maoe ikoetin sadja Radja poenja kahendak dan maoe toetoep sadja itoe kansin-kansin poenja rasia. Saja sendiri sadja jang tinggal beda dari itoe maka bagitoe lama baroe bisa naik pangkat. Kaloe bagitoe soedara-soedara samoewa tida perdoeli ditjela orang, samadjoega maoe bilang: biar orang maki, asal kita
