10
nanti dapet lagi satoe poenggawa jang bagitoe baik seperti taijdjin. Apa boleh boewat! Sekarang kita-orang moehoen sadja pada Toehan Maha Koewasa, soepaja taijdjin boleh slamet pandjang oemper dan dapet pangkat jang lebih besar lagi. — Bwee Kwee lantas bilang banjak trima kasih pada marika itoe dan samoewa lantas boebar poelang masing-masing.
Istrinja Bwee Kwee dan anaknja lantas membri slamet tinggal dan Bwee Kwee membri slamet djalan; kamoedian dia-orang iboe dan anak teroes brangkat berpraoe pergi di Sangtjioe. Besoekannja lantas dateng satoe poenggawa jang misti djadi gantinja Bwee Kwee, dan Bwee Kwee lautas serahken dia poenja kadoedoekan. Sasoedahnja selese, Bwee Kwee lantas brangkat pergi ka Kota-Radja, sekalian isi negri anter padanja dengen segala kahormatan sampe di watas negri.
Sasoedahnja djalan bebrapa hari, Bwee kwee bertemoe pada ampat orang jang toenggang koeda. Ini ampat orang lantas menanjak pada Bwee Kwee, katanja: Toewan dateng dari mana?
Bwee Kwee menjahoet: Saja dateng dari Shoatang.
Itoe ampat orang lantas toeroen dari koeda dan menanjak lagi: Apa toewan taoe, jang Lotaijdjin Bwee Kwee soedah brangkat?
