162
PENGHIDOEPAN
perhatian. Satoe-doea kalih akoe perna bitjaraken soealnja Graaf Ivan pada Zara, kerna Ivan ada minta akoe toeloeng sampeken apa-apa pada Zara; tapi semingkin banjak akoe boeka soeara dalem hal antara ia dengen Ivan, Zara semingkin djadi koerang seneng agaknja. Dan bila akoe tida ingin itoe sobat djadi mendongkol betoel-betoel, terpaksa akoe moesti simpangken omongan ka laen djoeroesan.
Sebaliknja Holbaz akoe liat selaloe ladenin itoe Graaf dengen sapenoeh hati, maski marika satoe sama laen poenja tabeat kanjataan bedah djaoe. Ivan ada satoe materialist, saorang hartawan jang hargaken berbagi kasenengan doenia; sedeng Holbaz ada menganoet prikabatinan, filosoof jang berpikiran loewas serta origineel—tida mengekor pada segala anggepan oemoem sadja, dan boeat kamenterengan doenia, kendati ia ada tjoekoep hartawan, ia tida teriket keras seperti Graaf Ivan, satoe materialist sedjati! Graaf terseboet, selaennja memang ketarik oleh Zara, poen ia sanget kagoemin tentang Holbaz poenja pengatahoean prihal electriciteit batin, maski dalem bebrapa bagian lang mendjadi dasarnja itoe pendapetan Ivan sebagi materialist (orang jang tida pertjaja hal roch), ada bertentangan anggepan sama itoe dokter jang gaib. Zara, samar-samar akoe dapet liat jang ia atjapkali djadi koerang seneng kapan ia saksiken iapoenja soedara dan Graaf Ivan bergaoel rapet, seperti di waktoe marika lagi bitjara atawa
