Bagitoelah tida lama kamoedian Kim-djin moelai bekerdja dalem itoe toko. Saban djem toedjoeh ia dateng dan pada djem satengah sapoeloeh atawa djem sapoeloeh malem baroe ia poelang.
Dalem bebrapa blas hari jang pertama, soenggoeh keada’annja_ tida enak sekali. Tjin-tek salaloe berada di dampingnja boeat kasi roepa-roepa katerangan dan pakerdjaan jang ia moesti lakoeken ternjata ada koesoet sekali. Di itoe waktoe djangan Sentara bisa mengobrol dengen Siok-nio, malah itoe gadis kaliatan moentjoel poen tida. Lebi djaoe Kim-djin moesti goenaken betoel-betoel tenaganja, djikaloe ia ingin bisa lekas beresken itoe pakerdja’an, boeat dapetken pakerdja’an jang senang di hari-hari jang brikoet.
Achirnja sesoedanja bekerdja berat tiga minggoe lamanja, ia boleh bilang, jang boekoe-boekoenja itoe toko samoea soeda beres dan bisa dioeroes lebi djaoe saban hari dengen gampang sekali.
Tjin-tek njataken ia poenja girang dan poeas dengen pakerdja’annja Kim-djin.
