— 84 —
„Kenapa si loe poekoel orang sampe begitoe!” berseroe Soeboer. „Diroema goea loe kaga boleh riboet, loe kaga boleh samain goea kaja si Asiong, laki loe jang doeloe, dimana loe boleh bikin poenja soeka!”
„Perdoeli apa, goea hadjar anak goea sendiri!” bales treak sang bini.
„Perdoeli apa? Kendati anak loe, goea jang piara, loe kaga soeka boleh pegi mampoes!”
„Loe oesir goea?”
„Ja, goea kaga soeka liat tjetjongor loe lagi! Hajo, loe pegi sekarang djoega! Biar si Rotti disini!”
„Enak betoel, ma'nja loe oesir, abis anaknja loe tahan!”
„Goea poenja soeka!”
„Ai, bangsat, loe, sekarang goea taoe, loe soekain anak goea!”
Si Soeboer djadi terkedjoet, ia tida kira lantaran marahnja ia djadi boeka resia, tetapi resia atawa tida, boeka atawa tida, itoe anak peroetnja soeda bengkak, soeda gendoet, toch aken ketaoean djoega. Nanti ketaoean, sekarang ketaoean, apa bedanja?
Si Rotti tinggal toendoek djoega, tapi soenggoe ia merasa maloe, tida loepoet ia merasa senang, matanja jang ketjil sama djoega mata tikoes saban-saban melirik pada si Soeboer, bapa koealonnja.
„Memang goea soekain anak loe!” treak si Soeboer dengen nekat. „Dari doeloe memang
