apa bedanja dengen di tinggal mati, sebab kaloe ia sendiri kemoedian tida poelang djoega, tentoe tida bisa ketemoe lagi
Asiong pikir-pikir, itoe waroeng soeda madjoe, Sajang-sajang kaloe didjoeal sama laen orang, mana lebi bae ia sadja ambil over boeat Afoek, soedaranja?
Ini pikiran ia kasi taoe djoega mertoeanja dan Akin djoega begitoe ada lebi bae, sebab sebetoelnja itoe waroeng banjak lakoe asal didjaga betoel dan moesti manis pada orang blandja.
Sebab itoe perdamian soeda moesti djadi, Akin bilang bae sekali kaloe besok Asiong dateng karoema sekalian bawa poelang si Rotti
Besokannja, Asiong laki bini dateng karoema orang itoe boeat itoeng soepaja orang banjak taoe, ia jang bakal gantiken Akin, dan tempo poelang, ia soeda bawa si Roiti
Njonja Djahat soeda kloear aer mata, sebab ia inget ini sekali ia aken tida ketemoe lagi anak dan tjoetjoenja.
Orang kata matjan begimana djahat, toch sajang anaknja, apa lagi menoesia, dan sedeng Akin beritoeng diloear sama Asiong dan Afoek, njonja Djahat djoega bitjara disebla dalem dengen anaknja jang ia kasi inget bae-bae, ini sekali ia sampe poelang ka Tiongkok lantaran si anak poenja klakoean jane tida oeroes: djadi, dia moesti inget betoel, djaga diri biar bae, sebab kaloe ada apa-apa, tentoe tida ada jang bela atawa lindoengin padanja.
