--5--
sama djoega barang dagangan, biarlah banjak orang jang mendeketin, tida beda dengen reclame, dari satoe djadi sepoeloe, dari sepoeloe djadi seratoes, lama-lama masa tida ada orang kaja jang dapet denger, entjek Akin ada poenja anak prawan bagoes?
Laen dari anak-anak orang Tionghoa, poen orang-orang Selam disitoe, sering dateng dan tinggal lama-lama diwaroengnja entjek Akin, tjoema soepaja bisa kenjang memandang moeka- nja Koenjit, jang boekannja maloe kena diawasin kaja maoe ditelen, malahan mingkin ia bikin-bikin tingkanja.
Boekan begitoe sadja, Koenjit soeka sekali kloear, apa lagi mandi di Kali Pasir, boleh ditentoeken satoe hari bebrapa kali ia pergi ka kali. Dia soeka sekali mandi disitoe, sebab kaloe dia lagi mandi, biasa orang moeda nongkerong dipinggir kali awasin padanja. Apa maoe dikata, koelit badannja ada poeti melepak kaja dibedakin, dadanja soeda moelain timboel, djadi gemoek. Kaloe ada lelaki moeda awasin, tra perdoeli apa bangsanja, ia sengadja oesap-oesap dadanja sendiri atawa poera-poera betoelin kaennja, hingga maoe atawa tida, orang djadi dapet liat seklebatan ia poenja sepasang tete jang mengkel.
Selaennja soeka mandi di kali, djoega ia soeka sekali menenangga, maen-maen sama anak-anak prampoean kampoeng. Kaloe ajahnja omelin pada
