-35-
bilang betoel dia, Asiong kata sajang sekali masi begitoe moeda soeda bertjere.
Tida lama Asiong poelang lantas Akin omong sama bininja jang itoe orang moeda asal satoe kampoeng sama dia dan tempo ia liat Koenjit tida ada, ia bilang sajang sekali itoe anak djadi telor boesoek, kaloe tida, soeda boleh dipastiken ia dapet mantoe si Asiong.
,,Dia kerdja apa ?" tanja bininja. ,,Kerdja kaleng di Sawa Besar."
Bininja lantas tinggal diam, sebab ia tida moepakat dengen perkataan lakinja, sedeng ia poenja maoe si Koenjit moesti dapet laki orang kaja, sekarang soeda djadi begitoe roepa, itoe pengharepan soeda ilang sama djoega asep ketioep angin kentjeng. Tetapi siapa taoe kaloe anaknja mati, orang boleh dibohongin, dikata Koenjit masi prawan, apa lagi sama sengke, masa dia taoe.
Dasar si Koenjit djoega, dia boleh sajang anaknja.
Sekarang ia tida bisa harep satoe apa lagi, djangan kata orang kaja, sekalipoen orang miskin tida maoe melamar. Pendeknja kaloe bisa lakoe berlaki, ia tida maoe taoe sama siapa.
Itoe satoe hari si Djahat oering-oeringan, tida inget makan atawa apa djoega.
Liwat doea hari kombali Akin kedatengan tetamoe, ini sekali boekannja Asiong, hanja Afoek, soedara toea dari Asiong. Sasoedanja adjar kenal dan doedoek minoem thee dan ngomong
