tjerewet sadja, kemampoean satoe apa tida ada. Orang laen poenja anak moeda-moeda soeda di kawinin, di bli'in segala apa, goea apa? Sih, engga maoe mampoes bapa begitoe!”
Si Djahat tanja lakinja, begimana akal sekarang. Akin tida bisa kata satoe apa tjoema ia bilang jang ia djadi iboe orang, tida bisa djaga anaknja sendiri, sekarang ia poen moesti taoe maoe bikin apa sama itoe telor boesoek?
Kombali Koenjit didalem kamer mengoetoek ajahnja lantaran ia dioepamain telor boesoek.
Achirnja itoe laki bini soeda berdami bawa anaknja moedik, toenggoe sampe soeda branak. baroe bawa poelang, kaloe itoe anak idoep, kata sadja ia soeda dikawinken di oedik dan soeda dapet anak lantas bertjere sebab lakinja keliwat djahat; kaloe oepamanja itoe mati, ada lebi bae lagi.
Akin achirnja menoeroet dan bilang pagi-pagi itoe iboe sama anak boleh pergi, djangan bangoenin dia, sebab dia tida maoe liat moekanja itoe telor boesoek.
Saban kaloe orang tanja, selamanja Akin bilang bini dan anaknja moedik oeroesin kebon bapanja. Tetapi biar begimana djoega tida loepoet Saonah soeda boeka itoe resia. Lantaran ia dipesen toetoep resia oleh njonja Djahat, ia mengarti kaloe ia boeka resia, tentoe njonja djadi maloe; ia poenja taoe, kaloe orang takoet dibikin maloe,
