Pelahan-pelahan ia pikir, masa anaknja brani berboeat begitoe, telen barang jang terlarang? Ach ini boleh djadi bisa-bisa’annja si doekoen sadja, jang maoe doeit.
Lantaran inget begitoe, ia djadi mara dalem hatinja pada Ma Saleha, ia kepel-kepel tangan dengen matanja djadi bringas, ia bilang sendirinja:
„Nanti goea adjar sama dia, masa anak goea boenting?”
la masoek dan doedoek tinggal bengong, ia pikir lagi sebalikan, sebetoelnja djoega apa si Koenjit bikin, itoe anak, maoe dikata saban hari pergi karoemanja Saonah. Sebab sampe itoe tempo si Koenjit belon poelang djoega, ia djadi dapet ingetan maoe pergi intipin.
la djalan kloear dan moeter djadi dateng dari blakang roemanja Saonah, ia dengerin, tida ada soearanja orang ngomong; ia dateng lebi deket dan mengintip dari pager, tida ada keliatan si Saonah, djoega Koenjit tida ada disitoe.
Kemana itoe anak? Apa dia mandi di kali?
Si Djahat soeda angkat kaki maoe djalan tjari anaknja ka kali, tempo ia liat anaknja djalan dari sebla dalem kloear di ikoet dari blakangnja oleh si Djoened, jang pelok lehernja dan tjioem moekanja.
Sang iboe jang mengintip dari loear, djadi gemeteran badannja dan marahnja boekan maen, ia soeda maoe bertreak sadja, bikin riboet, tapi seklebatan ia inget, kaloe ia bikin riboet, semoea orang nanti dapet taoe, ia djoega jang maloe.
