V. PANCANG GALANGGGANG DI PARIK BATU.
Tasabuik Tuanku Maharajo Dirajo
Iyo daulaik Parik Batu,
Disuruahnyo japuik kasadonyo
Iyolah nanti jo pangulu
Sarato pandeka jo dubalang
Sagalo rang gadang di nagari
Handak barundiang itu garan
Kan mancang galanggang di nagari
Untuak anaknyo Payuang Lauik
Pado hari nan ditantukan
Lah hadia arang di balairong sari
Langkok ganok kasadonyo
Duduak di tampek masiang-masiang
Rajo janang mautua siriah
Alah mangapua ciek surang
Alah manitah dang Tuanku
Ditanyo pikiran nan banyak tu
Tantang niaik jo mukasuik
Adokoh inyo samo suko
Dek alek iyo alek nagari
Adokoh sanggup anak rakyat
Manolong ala kadarnyo
Barupo padi jo taranak
Bakato nan tuonyo
Nan labiah tapandang dari nan banyak
”Ampunlah ambo dang Tuanku
Kami ko anak dari Tuanku
Tuanku Puti Payuang Lauik
Sadang rancak tu mah kini
Sadang manih dipandang mato
Santano bulan sadang panuah
Iyolah ampek baleh hari
95
