Tagak nan indak samo tinggi
Iyo kawan jo urang nan cako itu
Mamintak sajo kito garan
Iyo kapado Tuhan kito
Samoga Allah manolong kito
Amugah inyo maubah adaik
Si Bujang indak manjawek lai
Inyo mah lai tau juo
Bahaso inyo indak sapadan
Iyo jo Puti Payuang Lauik
Dek itu hatinyo harok cameh
Harok dek Puti manyarah sajo
Iyo di dalam paluakkannyo
Cameh dek inyo anak rajo
Lah sampai inyo karumah
Kudo diuruik dek palayan
Inyo taruih pail mandi
Sarato sambayang mah sakali
Kok sudah sambayang Magarik
Ayah jo Uwaik lah mananti
Iyo untuak makan malam
Lah sudah minum jo makan
Bakato garan Bidasari
Mano nak kanduang Bujang Uwaik
Sajak tadi Uwaik paratikan
Buyuang banyak tunduak tangadah
Nasi indak bara tasuok
Muko Buyuang yo agak pucek
Sakik koh garan anak Uwaik
Dek si Bujang tahantok sajo
Kato disambuang Bidasari
Ado Uwaik mandanga kaba
Buyuang biaso iko kini
Iyo pai ka Parik Batu
39
