Kan jaleh pulo tu dek urang
Sabagai pulo itu Mamak
Pado pikiran ambo pulo
Usah galanggang lamo-lamo
lyo sampai babulan-bulan
Cukuik sapakan duo pakan
Usah kito talampau payah
Jangan pulo barabih bana
Nan di hati denai iko
Indak mancari urang lain
Sabab dek inyo kamanakan
Iyolah Sutan Lembak Tuah
Lai mah patuik itu garan
Iyo pulang kaanak ambo
Kuah tatumpah nyo kanasi
Dek nasi ka dimakan juo.
Alah tajanji itu garan
Iyo kapado adiak ambo
Bia janji sambia bagarah
Di inyo:dibawo masuak hati
Tapi sungguahpun baitu
Namonyo kito banagari
Dek ambo daulaik pulo
Patuik babaso ka nan banyak
Usah urang mangatokan beko
Kito mancakau ayam dalam kandang
Iyo mamaso anak kamanakan
Takuik pitih kan kalua
Juo sagan bakarajo barek
Maambiak urang kan minantu
Indak malengong ilia mudiak
Manyambah garan Manti Tuo
Ampun Tuanku Rajo kami
Nan satahu ambo garan
99
