— 339 —
XXIII
POELO MONTE-CHRISTO.
Maka sesoedahnja lama tida bisa dapet lantaran aken dateng di Monte-Christo, sekarang ini Dantes dapet soewatoe djalan bagoes aken dateng di poelo itoe dengen gampang dan dengen tida menerbitken sjak apa-apa.
Dantes melinken misti menoenggoe semaleman lagi sadja. Ija belon taoe meliwati satoe malem ijang begitoe senang. Ampir ija tida tidoer; kerna kaloe ija meramken matanja soeratnja cardinaal Spada lantas berbajang-bajang di depan matanja, dan kaloe ija lajap-lajap sebentaran, ija dapet roepa-roepa impian ijang menerbitken rasa kaget dan girang. Ija mengimpi masoek ka dalem satoe goewa ijang seperti ada tertaboer dengen intan dan lain-lain roepa permata moelia, sedang moetiara ada djatoh-djatoh seperti ajer ijang menetes. Dengen girang ija isiï sakoe badjoenja dengen itoe permata-permata moelia, dan ija lantas kaloewar dari itoe goewa, tapi setelah sampe di loewar, sekalian batoe permata ijang ada di sakoe badjoenja, semoewa berobah djadi batoe karang, hingga ija djadi kaget dan masoek kombali ka dalem goewa; sedang begitoe, djalanan djadi berboelak-belok dan lobang goewa tida katahoeän lagi di mana adanja.
Pada waktoe mata-hari terbit, Edmond berbangkit dari pembaringannja dan merasa sangat tida enak di hati.
Setelah hari soedah djadi petang, orang-orang kapal bersedia, aken belajar dan sigralah djoega soedah djadi sedia,
