- 49 -
pada iboemoe, itoe djoega kita tida taoe, tetapi kaloe seandenja betoel begitoe, njata ia ada poenja ingetan jang soenggoe, laen dari itoe ada menoeroet atoeran jang bener; maka akoe soeka kasi inget, kaloe ia satoe kali boeka soeara minta angkau toeroet djadi bininja, inget baek-baek . . . djangan menampik."
Soekmi seperti terkedjoet denger begitoe, ia tinggal diam sekoetika lamanja sedeng moekanja lagi-lagi djadi mera, achinja ia berkata:
„Ach, bibi bitjarain pepesan kosong, oepamanja ikan belon dapet ditangkep, soeda sedia boemboe, achirnja ikan tida dapet, itoe boemboe diboeang."
„Ai, ini anak!" kata Wardji seperti maoe seselin orang. Apa kowe masi djoega koerang pertjaja? Tjoba nanti liat, tandain moeloetkoe."
Soepaja tida bikin Wardji djadi marah, Soekmi lantas bilang, jang ia djoega maoe liat begimana itoengannja Eng Siang tjotjog atawa tida, sekalipoen dalem hatinja ia merasa pasti jang Tjan memang ada poenja ingetan padanja, sebaliknja ia sendiri poenja hati djoega seperti soeda kena didoedoekin oleh Tjan.
Tetapi sebab ada saorang prampoean, ia tida brani kataken itoe, laen dari itoe ia merasa sangsi, satoe moestail saorang Tionghoa mampoe,
