- 33 -
nja Bok Darmi, itoe Loera jang kenal baek dengen toean Ong Liang Soei, maka ia soeka menganter djalan, sekalian maoe ikoet itoe toean pasang boeroeng, maka ia ada bawa soempitan, sebab ia bilang ia lebi soeka menjoempit dari pada menembak sekalipoen ia sendiri ada poenja senapan. Loerah-loerah di Tjomal ada banjak jang mampoe, kabarnja lantaran disitoe ada fabriek goela.
Serta sampe di itoe roema kampoeng, itoe Loerah memanggil orang kasi taoe ada tetamoe tjari. Bok Darmi kloear dan djongkok disamping pintoe roemanja oendjoek hormatnja pada ia poenja kepala dessa.
Tjan pandang itoe prampoean toea ada berpakean bersi dan ia liat sapoeternja itoe pekarangan djoega ada bersi sedeng disamping dari itoe roema, jang ada besar djoega kiri kanan ada ditanem palawidja teroes sampe diblakangnja.
Dalem hatinja Tjan, ini orang boekannja terlaloe miskin, ia djadi lebi heran jang Soekmi soeda lebi soeka berkoeli di Pekalongan.
Loerah kasi taoe siapa jang tjari Bok Darmi, tapi seblonnja berkata satoe apa, Tjan bilang pada toean Ong Liang Soei, baeklah ia landjoetken niatnja pasang boeroeng dan ia toenggoe disitoe sadja dengen berdjandji nanti poelang
